الساعة كام معاك دلوقتى؟

السلام عليكم
طبعا العنوان غريب زى ما انتم اكيد اتعودتم خلاص معايا...الساعة كام معاك دلوقتى؟!!! احيانا بأحس انى كنت المفروض انى اكتب فى مجلة شبابية يقرأها كتير من الشباب زى مجلة كلمتنا مثلا ...المهم ما علينا
انا كنت اتكلمت قبل كده فى موضوع التخصص بس كان فيه نقطة انا ما وضحتهاش اوى وهى مشكلة الوقت...طبعا انتم عارفين ان احنا عايشين فى عصر التخصص دلوقتى لكن انا بقول ان فى خلال القريب العاجل جداهنعيش عصر التخصص جوه التخصص...غريبة مش كده بس هو ده اللى هيخصل صدقونى وفيه دلايل على كدخ للى مش مصدق وده مثال كنت كلمت فيه بن خالتى طارق انهاردة...وهو مثلا شركة زى شركة لينك واللى شغال فيها مجموعة من الحمقى الحاصلين على مرتبات خيالية بدون اى وجه حق...ديه مثلا تلاقى فيها ناس شغالة نتورك وعندها فكرة عن السيكورتى وبالكتير اوى هتلاقى الناس ديه يا اما تخصص ميكو يا اما تخصص سيسكو وشكرا
لكن تعالى مثلا فى شركة تانية متخصصة فى الشبكات والامن هتلاقى عندها مثلا فى قسم الأمن ناس تخصص أمن الويندوز وانظمة تشغيل ميكو وناس تخصص أمن للأكسينج سيرفر بس وناس تانية لقواعدالبيانات وناس تانية لأمن الشبكة نفسها وهكذا...لحد كده كلام جميل...لكن
تعالوا بقى نبص لشركة ميكو نفسها...الشركة فاهمة كويس اوى ومؤمنة جدا بموضوع التخصص لكن اللى حاصل انها مش مدياك وقت عشان تتخصص على طول بتقدملك الجديد يعنى لو حضرتك كنت متخصص أتصالات فى الويندوز شامل بقى الـ VPN و الـ RAS وغيرها هتلاقى الشركة بتقدملك حاجات جديدة او انها تخليك تتوسع فيهم عن طريق ربط الحاجات ديه بمنتجات تانية زى مثلا ربط الـ VPN مع الايزا أو مع قواعد البيانات وطبعا حضرتك لو فعلا مهتم انك تعرف هتلاقى نفسك بتذاكر الحاجات ديه وواحدة واحدة هتلاقى نفسك بتبعد عن المجال اللى انت عايز تتخصص فيه...او بالأصح مش هتركز فيه اوى زى ما انت معتقد لان التفريعات هتكتر والتكنولوجى الجديدة بتنزل بسرعة...مش عارف ليه باحس احيانا ان الشركة مش عايزنا نتخصص اوى فى منتجاتها...يمكن عشان مش نكتشف الـ BUGS فى المنتجات بتاعتها...مش عارف ليه الموضوع ده فكرنى بكمية الدعاية الضخمة اللى الشركة عملتها مع الـ SP2 بتاعت الـ XP والشركة قعدت تقول نزلوها بسرعة ديه هتخلى الجهاز بتاعكم حكاية سريع قوى...انا مش بادعى انى موظف فى ميكو لكن انا باتابع اخبارها...وصدقونى الشركة معملتش 1/10 من الدعاية ديه لما نزلت windows 2003 server وما أدراكم وما السيرفر...اللى لو بس عطس هيخلى الـ XP شوارع وأزقة وحوارى كمان ...ده غير ان الشركة نزلت بعده الـ R2 وبرده مفيش ولا حس ولا خبر...يبقى الموضوع مش موضوع انه حاجة جديدة وبس لا ده موضوع ان الـ SP2 بتحل مشاكل خطيرة كانت موجودة فى الـ XP مش مجرد تحسين للشكل والكلام اللذيذ ده...الظاهر انى شكاك زيادة عن اللزوم بس ده اللى انا حسيته فعلا...
إذن الشركة مش بتعارض التخصص لكن لحد معين مش هتسمح هى انك تزيد عنه...التخصص اللى يحل المشاكل ماشى...اما التخصص اللى يخليك تعرف حاجات مش يصح انك تعرفها...فلا والف لا كمان...والشركة بتحل الموضوع ده بسهولة لذيذة جدا وهى انها تعمل حاجة من الاتنين يا اما تنزل منتج جديد يحل محل القديم اصلا زى مثلا الفيستا مكان الـ XP يا اما تنزل حاجة تصلح الموضوع ده من غير المستخدم ما يحس زى الـ SP2 مثلا.
وطبعا لو حضرتك قررت تتمسك بالتكنولوجى القديم اللى انت شغال بيها الناس مش هتقول عليك متخلف وبس لا ياريس...ديه الشركة كمان هتحرمك من امتيازات انت محتاجها...زى مثلا برامج انت محتاج تنزلها يقولك عايز الـ DOT NET FRAMEWORK الاصدارة التانية او ان الـ GIANT SPYWARE عايز XP وغيرها من الحاجات اللى هتخليك مش بس ترقى لا...انك تنسى كمان الحاجة اللى انت معجب بيها وعايز تتخصص فيها.
فى الاخر معنديش حاجة اقولها غير ان التطور مش بيستنى حد وان اللعب مع الكبار خطير بما فيه الكفاية واى محاولة من ناحيتنا اننا نرفض او نتمرد الشركات الكبيرة مش هتتعب نفسها حتى وتعرف انت بتقول اية لان ردها مش هيكون دعاوى قضائية او فورم تفتحه على النت او حتى تكلف كتاب كبار انهم يعددوا مزايا الحاجة اللى حضرتك بتقول ان فيها عيوب خطيرة...لا...ابسط حاجة تعملها انها ترد عليك بمنتج جديد او ميزة جديدة تضيفها وساعتها ولا حد هيسمعك لان الجديد برده ولازم نعترف ان له سحره.

لون طاقيتك اية؟

السلام عليكم
أنا عارف أنه عنوان غريب...بس فعلا لون طاقيتك اية؟
اسمحولى اقولكم اية اصل الموضوع...بصوا يا جماعة فيه تلات الوان من الطواقى...فيه اللون الابيض واللون الاسود واللون الرمادى...مممممم...متهيألى جزء كبير منك بدأ يستنتج انا اقصد اية بالالوان ديه...اولا بس احب اقول حاجة مش عارف لو لها علاقة بالموضوع ولا لا...
كان فيه واحد اسمه طارق...الراجل ده برغم اختلافى معاه الا انى دايما بأحترمه...تقدروا تقولوا ده نوع من الاحترام اللى انت بتكنه لمنافسك فى سباق الـ 100 متر...المهم الراجل ده فى الاول كان بيسعى لانه يعرف ويقرأ ويتابع كل جديد سواء الجديد ده كان حلو او وحش...وركزوا معايا شوية يا جماعة فى موضوع الحلو والوحش ده...المهم طارق فضل يقرأ وعرف لحد ما بدأ يشتغل الحمد لله...لكن هنا بقى حصل شوية تغيير..
اولا هو فضل يقرأ ويتابع لكن بيقرأ اية وبيتابع اية...هو فضل يقرأ ويتابع كل حاجة متعلقة بشغله وبس...اه ممكن يكون بيتابع التكنولوجى الجديدة بس برده اللى فى مجال تخصصه فقط...يعنى تركيزه كله كان على حل المشاكل اللى بتقابله فى الشغل وبس...فتحول بشكل ما إلى موظف تقليدى...يمكن يكون عنده جديد يقدمه...لكن الجديد ده مفيهوش جديد...ياترى فهمتونى يا جماعة ولا لسه؟!!!
ماشى نرجع لموضوعنا...هاسألكم سؤال يا جماعة...اية الفرق ما بين أدمن شغال فى شركة لينك وأدمن شغال فى المخابرات...مع فرض ان الاتنين عندهم عدد سنين الخبرة والاتنين عندهم نفس الشهادات...اية اللى يفرق الاتنين عن بعض؟!!!...واية اللى يخلى الراجل بتاع لينك مايعرفش انه يشتغل فى المخابرات مثلا؟!!!
مش هما الاتنين عندهم نفس الشهادات...امال فيه اية؟
اقولكم انا يا جماعة...الفرق ان الراجل بتاع المخابرات قرر انه يستفاد من اللى درسه بطريقة مختلفة شوية..طريقة التفكير يا جماعة نفسها...بصوا ما ينفعش واحد يكون MCSE يصحى من النوم بكرة يقول انا قررت انى اكون شرير او انى استغل معلوماتى فى الشر...الا لو كان هو مؤهل لكده يعنى يقدر يفكر اصلا فى كده...وهو ده المقصود بلون طاقية حضرتك...وهأقولكم دلوقتى كل لون بيدل على اية:-
أصحاب القبعات البيضاء:- ودول الناس الطيبين اللى مش بيعملوا اى أذية وده يرجع لسبب من اتنين يا اما هما اصلا مش عارفين يا اما عارفين ومش بيعملوا.
أصحاب القبعات السوداء:- ودول بقى الناس الوحشين اللى بيطلعوا للناس فى الضلمة ويقوللهم بخ...ودول عايشين على الاذية...ودول صدقونى اقرب مما تتصوروا.
أصحاب القبعات الرمادية:- ودول بقى ناس طيبين لكن فاهمين ومش بيعملوا الاذية ديه الا لو كانت لصالح الخير...حاجة كده زى فيلم Mission Impossible
لو سألتونى رايى اقولكم ان أفضل نوع هو النوع الاسود وبعده يجى الرمادى اما النوع الابيض فده نوع سلبى وسىء جدا فوق ما تتصوروا لانه لو مكانش عارف يبقى مالوش لازمة فعلا ولو كان عارف ومش بيعمل يبقى سلبى لانه مش محدد موقف.
اما النوع الاسود اللى انا باعشقه نظرا لوضوحه الشديد برغم ان اعارف ان فيه ناس بتلعنه بس يا جماعة انا عايزكم تبصوا للذكاء الانسانى الـ pure الذكاء الانسانى اللى ماتقدرش تعمل حاجة غير انك تنحنى له.
نيجى بقى للنوع الرمادى وده نوع كويس لانه بيكون دارس اساليب النوع الاسود كويس جدا عشان يقدر يتعامل معاه بس كالعادة طريقة الاتنين مختلفة فى قراية المعلومة...يعنى لو واحد فيهم قرأ مقالة عن طريقة تشفير ملفات الضغط مثلا...هتلاقى النوع الاسود وهو بيقرأ بيفكر بيسأل أزاى اكسر الحماية ديه؟...لكن النوع الرمادى بيسأل ازاى الحماية ديه اكسرها عشان اعرف الاقى طريقة لسد الثغرة ديه؟!!!...وده طبعا لو كان بيتم كده كان النوع الاسود اختفى لكن المشكلة ان النوع الاسود غالبا بيبقى مثابر...دايما بيدور على كذا طريقة عشان يكسر بيها مش طريقة واحدة يعنى...مش عارف ليه الموضوع ده فكرنى بالسؤال اللى اتسأل لأينشتين لما قالوله اية الفرق ما بينك وما بين الانسان العادى؟
قالهم الانسان العادى لو طلبوا منه انه يدور على ابرة فى كوم قش...بمجرد ما يلاقى الابرة هيبطل يدور...فى حين انى انا هأفضل ادور على ابر تانية.
متهيألى اينشتين كان بيحب القبعات السوداء؟!!!!
فى النهاية يا جماعة انا مش باحب اسمع كلام من عينة هو انا هاستفاد اية لما اعرف أذى مش المهم انى اعرف اشوف شغلى وبس...او ان مفيش وقت او ان ده لعب عيال زى ما صديقى طارق بيحب يقول دايما...صدقونى يا جماعة الناس اللى بتشتكى من الوقت تعمل زيارة بسيطة لموقع الـ MSDN أو مواقع الشبكات اللى كلكم عارفينها زى windowsnetworking أو windowsecurity هتلاقوا الناس اللى بتكتب هناك اصلا شغالة فى شركات تانية والفت كتب قبل كده...ياحول الله يارب...يعنى مشكلة الوقت مش موجودة عندهم...وبالنسبة للمواضيع انا عايزكم تشوفوا الناس اللى بره بتكتب فى اية...حاجات من نوعية اللى ناس كتير هنا تقول عليها لعب عيال...وده طبعا راى جاى من ناس بتفهم ولها اسمها فى عالم الـ IT لكن للاسف بيحزننى انى اسمع الكلام ده منهم هما بالذات...ونرجع نقول هو ليه مفيش هاكرز عندنا فى مصر...متهيألى دلوقتى عرفنا السبب او على الاقل عرفنا سبب من الاسباب.
الا صحيح لون طاقيتك اية بقى؟

إحنا رايحين فين؟

السلام عليكم
ازيكم يا جماعة اخباركم اية...بقالى فترة مش كتبتلكم...وفيه ألف موضوع فى دماغى ودلوقتى اول ما جت الفرصة عشان اكتب تايه مش عارف اختار اية...بس المرة ديه اسمحولى انى اكون متحيز لأصدقائى من حماة الأنترنت والشبكات...ايوة بالضبط كده...عايز اتكلم عن مهندسى الشبكات...بس طبعا مش هأتكلم عن عبقريتهم أو غرورهم...لا انا هأتكلم عن الناس ديه رايحة فين وبالذات فى مصر
بصوا يا جماعة طبعا أنتم عارفين الناس ديه كانت اية من 8 سنين...كانوا اساطير تسير على قدمين وده عشان النت كان جديد وكله كان بيسأل اية موضوع النت والشبكات والكلام ده...لحد دلوقتى زى ما أنتم عارفين بقى اى حد بيعرف يأرج أو واخد حتى MCP
يقول انه محترف شبكات...لا حول الله يارب...امال يونس يقول اية وعبد الله و reagentو busbar
والعبد لله كل الناس ديه تقول اية عباقرة بقى...ماعلينا...انا عايز اتكلم عن مستقبل الشبكات فى مصر اية وبالتالى مستقبل الناس اللى شغالة فى المجال ده
طبعا يا جماعة انتم عارفين إن المجال ده بالذات بيحصل فيه تقدم بصورة خيالية سواء عن طريق التطور اللى بيحصل فى المنتجات القديمة زى الايزا مثلا أو المنتجات الجديدة اللى بتنفصل عن المنتجات الجديدة زى سيرفر الـ LCS مثلا أو المنتجات الجديدة اللى بتتطلع زى الـ BizTalk مثلا وكل ده طبعا محتاج إن الادمن يلقى عليه نظرة أو انه على الاقل يعرف وظيفة كل منتج من المنتجات ديه لانه طبعا مش معقول يدرس كل الحاجات ديه الا لو كنا بنتكلم عن سوبر مان طبعا...
ده غير طبعا الشبكات اللاسلكية وما أدراك ما الشبكات اللاسلكية...الاختراع الرهيب اللى هيقول للكابلات باى باى يا قلبى...ماعلينا
انا دايما كنت بسأل نفسى ياترى احنا كمهندسين شبكات رايحين فين واية الطريق اللى هنمشيه ومين اللى هيححده هل احنا بايدينا ولا المبرمجين والناس بتوع قواعد البيانات هيبقى ليهم كلمة فى الموضوع...وانا قدرت اوصل لشوبة نقط كده بسيطة الخصلها لكم كالاتى:-

1- الشبكات اللاسلكية هى البديل القادم والوحيد للشبكات السلكية...طبعا انا مش باقول ان الكلام ده هيحصل بعد سنة او 3 أو حتى 5 لكن هيحصل فى يوم من الايام وديه حقيقة لازم اى ادمن يكون عارفها كويس جدا برغم كل المشاكل الموجودة فى الوايرليس حاليا وبرغم عدم انتشارها وغيره وغيره كتير لكن الشاطر هو اللى يبتدى يمشى فيها من دلوقتى لان خبرته ساعتها هيكون ليها تمن.

2- فيه بعض المنتجات اللى هتكون قوية جدا جدا وهتكون هى اللى مسيطرة على السوق والشركات هتطلب الناس اللى شغالة فى المنتجات ديه بالاسم وبالتخصص فيها كمان زة مثلا الاكسينج والايزا والشاير بوينت وكل واحد من دول ثقيل بما فيها الكفاية وحاليا فيه بعض الشركات اللى بدأت تطلب فعلا اكسينج أدمن أو غيرها من الوظايف المتخصصة جدا..وياريت الفاضى فيكم يدخل على البلوج بتاع ملك الايزا توماس شيندر ويشوف القصر اللى هو عايش فيه وبيقولك ان القصر ده من الايزا بس!!!!!!!!!

3- غالبا هيبقى فيه منتج واحد هو اللى بيقدم الوظيف المطلوبة منه وهيكون قادر انه يشتغل على كل انظمة التشغيل يعنى مثلا بدلا ما أحنا عندنا الايزا وعندنا السيكويد لا اللى هيكمل فيهم واحد بس وهيكون قادر انه يشتغل على النظامين فى نفس الوقت او يمكن يطلع منتج تالت يكون احسن منهم ويشتغل على النظامين برده...وقيس على كده بقية المنتجات...انا عارف انها فكرة خيالية بس اللى مش مصدق يتذكر لغة السى.

4- داخل مجتمع الشبكات نفسه هيظل برده نظرة كل طبقة للتانية بمعنى ان الناس بتوع الويندوز هيظلوا اعداء للينكس والناس اللى شغالة wire هتقاوم الهجوم اللى جاى من الناس اللى بتنادى بالـ wireless والناس بتاعت سيسكو هتعتقد انها متحكمة فى الدنيا كلها وان الناس اللى شغالة سواء ويندوز او لينكس ما هم الا مجموعة من الحمقى مش عارفين اية اللى بيحصل حواليهم وده يفسرلك ليه الناس بتاعت سيسكو عمرها ما شاركت فى اى معركة مابين الناس بتوع الويندوز واللينكس!!!!!

5- هنشوف بعد كده عصر التخصصات جوه التخصصات...يعنى مثلا ممكن تقابل واحد تقوله صباح الخير...انا اسمى أحمد وشغال فى خدمة الـ RAS فى شركة ام سحلول...وهو يرد عليك يقولك...أهلا وسهلا يا استاذ أحمد...معاك علاء...شغال فى خدمة الترمينال سيرفيس فى شركة أم نبيل لخدمات التليفون...كد يعنى فمش عايزك تندهش...والعالم كله بيتجه ناحية التخصص...ويمكن فيه ناس هتستغرب لما تعرف أن فيه فعلا إدارات جوه ميكو نفسها مختصة بس بالخدمات ديه!!!

اظن ديه أهم نقط انا وصلتلها بالنسبة للشبكات فى مصر او حتى على مستوى العالم...وبالنسبة للناس اللى عايزة تسأل لو كان مصير الناس بتوع الشبكات مرتبط بالمبرمجين او الناس بتاعت قواعد البيانات...فكل اللى اقدر اقوله انى بأحس دايما ان الراجل بتاع الشبكات هو اللى بيختار طريقه بايده وصعب جدا يتفرض عليه حاجة او رأى...لكن اللى انا شايفه حاصل هو وجود تعاون بس فى بعض المجالات بينه وما بين المبرمج أو بينه وبين الراجل بتاع قواعد البيانات...على الاقل لحد دلوقتى بس...يمكن بعد كده تتطور العلاقة وتبقى اية؟...ما اعرفش بالضبط...ولو انى لسه خايف جدا من الراجل بتاع قواعد البيانات زى ما قلتلكم قبل كده...وخصوصا بعد الاهتمام المبالغ فيه واللى الشركة بدأت تديهوله عن طريق بعض الشهادات المتخصصة جدا جدا فى الـ SQL ...فيه حاجة بتحصل يا جماعة صدقونى بس اية هى ما أعرفش..انا خلصت كلام واتمنى انى أكون قدرت اوضح اللى كنت عايز اقوله...شكرا

تخصص جديد

المستقبل مجهول..الحاضر محزن..الماضى مخجل..يبقى ناقص اية تانى عشان نفتح البلكونة وننط منها...لا استنى لسه فيه أمل..
اه يا شبكات يا مدوخانى معاكى..ياللى صرفت عليكى دم قلبى..وسهرت ليكى أيام مش فاكر عددها..وفى النهاية اية..للاسف العائد مكانش مناسب للمجهود..ظروف البلد ولا طريقة التفكير فى البلد ولا سوء حظ ولا اية بالضبط؟..مش عارف
اللى جاى ده يا جماعة...أفكار واحد اللى هو العبد لله أثناء ما هو كان راكب فى المشروع و اثناء ما هو كان بيستحمى و أثناء ما هو بيمشى فى الشارع وحيدا وهو مروح..يعنى كلها لحظات تجلى زى ما أنتم شايفين..
بعد متابعة اخر المقالات لاخوانا الامريكان و قراءة الكتب اللى نزلت مؤخرا على النت..أكتشفت حاجة لذيذة اوى..طبعا الناس ديه هى اللى انا خدت منها فكرة التخصص اللى قعدت انادى بيها لحد ما صوتى اتنبح فى البلد الخربانة ديه..وياما ناس عارضتنى وقالتلى انت بتحلم بس الحمد لله بدأوا يقتنعوا مؤخرا زى ما كانوا مش مقتنعين بفكرة الشهادات لأنهم كانوا معتمدين على الخبرة وبس برغم انى قعدت أاكد على كلام شركة ميكو اللى حاطة عنوان رئيسى لها فى صفحة الشهادات بتاعتها وهو "أزاى الناس تعرف انك عارف!!" وهى ديه فايدة الشهادات الوحيدة..بس الحمد لله الناس بدأت تفهم.
دلوقتى بقى الناس بره بقت بتتخصص بطريقة جديدة شوية..تخصص اقرب للدكاترة شوية...اقولكم ازاى
فى الأول كنا بنقول ان الراجل ده متخصص فى الايزا سيرفر أو فى الاكسينج أو غيرها من السيرفرات وساعتها كنا بنقول والله كويس..هو ده اللى احنا عايزينه..وانا مازلت باكد على الكلام ده وشايف ان اللى بيتخصص بالطريقة ديه هو راجل محترم وفاهم هو بيعمل اية..بس تعالوا نشوف طريقة تانية للتخصص..
نفكر كده مع بعض..الراجل اللى هو متخصص فى الايزا سيرفر ده بيعمل اية؟..
الجواب: الراجل ده بيطبق احد و أفضل حلول ميكو لتقديم خدمة الانترنت للمستخدمين..مممم...معنى كده ان الراجل ده بالكتير اوى هيطبق الحل بتاعه اللى هو مايعرفش غيره لو كانت الظروف مناسبة..لكن لو مكانتش مناسبة فاية اللى هيحصل..أقولكم..بما ان حضرتك فى مصر يبقى اكيد الراجل ده عايز يحافظ على لقمة عيشه فالنتيجة هى انه هيطلع كلمة ما اعرفش من القاموس بتاعه ويحاول انه يوظف المنتج اللى شغال به الا وهو الايزا سيرفر على الوضع اللى عنده..وده طبعا ممكن يأثر على الناس اللى هيستخدموا المنتج ده أو انه يحمل الشركة اللى جابته تكلفة أكبر مما هى تستطيع..وطبعا فى الحالتين غلط.
طيب تعالوا نشوف بقى لو كان الراجل ده متخصص فى تقديم حلول الانترنت..يعنى اية؟!!
يعنى الراجل ده بيعرف يستخدم الايزا سيرفر و الـ NAT و الـ ICS و الـ SEQID و أنت فاضى ولا اية نظامك؟!! لان فيه حلول كتير..وبكده وقت ما شركة ITتدخل tender عشان تقدم حل لخدمة الانترنت لشركة ما..هتلاقى المدير بيرفع السماعة ويطلب الباشمهندس فلان لانه هو الراجل المناسب لهذه العملية الخطيرة..
ونقيس بقى على كده حاجات تانية كتير...مثلا يبقى فيه راجل متخصص فى تقديم حلول الـ MESSAGING يبقى ساعتها يقدر يحدد امتى يختار EXCHANGE 2000 أو 2003 أو امتى يطلب LCS وغيرها من الحلول المرتبطة بخدمة الـ MESSAGING
و الراجل اللى هو متخصص فى عمل INFRA STRUCTURE للشبكات يبقى جاهز عشان يعرف لو هنحط ACTIVE ولا لا طيب اية نوعية السيرفرات اللى احنا محتاجينها طيب وعددها كام طيب هنعمل اية لو عندنا انظمة تانية وازاى هننسق ما بينها وبين بعضها..الخ
وطبعا ده ما يعفيش اى واحد من الناس ديه انه يعرف فى التخصصات التانية لانه مش من المعقول ان واحد نطلب منه انه يعمل حل لخدمة الانترنت وهو مش عارف يعنى اية ACTIVE أو يعنى اية INFRASTRUCTURE
متهيألى التخصص اللى بالطريقة ديه أوسع واشمل شوية وبالنسبة للشركات اللى بتقدم حلول هتقلل عدد الناس اللى هى محتاجاهم للشغل..بالاضافة لرفع درجة التنسيق مابين مهندسى الشبكات نظرا لقلة العدد المساهم فى الموضوع..
عشان كده انا بادعو كل واحد انه يراجع فكرته عن التخصص ويشوف هو راسم لنفسه اية فى المستقبل؟..هل يفضل الراجل بتاع كله وبكده طبعا نهايته معروفة...ولا يتخصص او يحافظ على تخصصه الوحيد فى اى سيرفر من السيرفرات المستخدمة فى الشبكات وبكده هيفضل فى دايرة مغلقة..ولا يبتدى يفكر زى الناس اللى بره ويعرف انه لا مانع انه يفضل محافظ على تخصصه مع امكانية التوسع فيه لصالحه ولصالح الشغل برده..
ياجماعة الناس اللى بره دلوقتى بتنادى بالـ SBC و الـ Internet Solutions وغيرها من الحلول المتكاملة..ياريت احنا كمان ما نحصرش نفسنا فى دايرة صغيرة ونقول ان احنا عاوزين نبقى عباقرة فى الحاجة الفلانية على حساب المعرفة الاوسع و الأشمل.

"شيئان فقط يتمتعان باللانهائية..الكون والغباء البشرى..الا اننى لست واثقا من الاولى"..ألبرت اينشتين

عودة القبيح

السلام عليكم
دلوقتى بقى اسمحولى اقولكم اية موضوع القبيح ده...بصوا ياجماعة انا اللى اعرفه انى اسأل واحد واقوله انت شغال اية يقولى شغال دكتور أسنان...ساعتها خلاص خلصت أو انى اسأل واحد اقوله شغال اية يقوللى شغال نجار...برده خلصت...لكن يقوللى شغال قواعد بيانات ساعتها بقى فيه كلام تانى...ممكن كده أخد من وقتكم دقيقة نراجع فيها تاريخ الراجل ده..يعنىمش هنرجع كتير بتاع حوالى 8 أو 10 سنين...كان ساعتها أول ما نسمع واحد يقول انه شغال قواعد بيانات كان اللى بيجى فى بالنا ان الراجل ده DATA ENTRY
على طول كده من غير احراج هو ده اللى كان بيجى فى بالنا وكانت قواعد البيانات ساعتها هى الاكسس فى نظرنا وكان الرراجل ده غير معترف به على الاطلاق وكانوا طبعا الناس بتاعت الشبكات هى اللى مولعاها بحكم ثورة الانترنت سنة 1994 والموبايل اللى خلى الناس تبص كده ولو من بعيد على الناس المبرمجين من باب تشجيع نظرية الـ MOBILITY
المهم فضل الحال على ما هو عليه لحد ما صحينا فجأة لقينا الشركة بتقول يا جماعة انا عملتلكم حاجة اسمها اس كيو ال سيرفر وسيبوكم بقى من الاكسس والكلام الفاضى ده والراجل بتاع قواعد البيانات لقى نفسه بيدرس شبكات وساعتها حس بكمية الباور اللى تحت ايده وديه حاجة مش يفهمها غير الراجل بتاع الشبكات...المهم معنى كده ان الراجل ده دلوقتى بقى بيفهم فى حاجتين اولا قواعد البيانات والشبكات...خلى بالكم ديه اول نقطة
تانى نقطة...زماااااااااااان كان الراجل ده يجيله الراجل المبرمج ويبصله من فوق ويشخط فيه ويقوله:- اسمع يا ولد انت انا عايزك تعمل قاعدة البيانات بتاعتك السخفية ديه على الاكسس الغبى بتاعك ده عشان أجى انا بعد كده اعمل برنامج المستخدم يحبه ويقرأ البيانات بتاعتك ويعدل فيها...وساعتها كان الراجل الغلبان يرد يقول سمعا وطاعا يا مولاى المبرمج
لكن دلوقتى بقى فيه حاجة اسمها سيرفر لقاعدة البيانات والمبرمج بقى محتاج مساعدة ومشورة الراجل بتاع قواعد البيانات ده لو كان عايز يعمل برامج بجد مش برامج بوجى وطمطم...وكده يبقى هو ازاح اول وأهم عقبة فى طريقه وهى المبرمج
نيجى بقى للراجل بتاع الشبكات وده طبعا زى ما أنتم عارفين راجل فى قمة الغرور وشايف نفسه قمة فى العبقرية لانه بيتحكم فى أجهزة وسيرفرات الشركة كلها وهو حاطط رجل على رجل بمساعدة أدوات ميكو الرهيبة أو الادوات الموجودة فى نظام التشغيل بتاعته فيجى الراجل بتاع قواعد البيانات ولاحظوا هنا ان الراجل بتاع قواعد البيانات بيتكلم نفس لغة الراجل بتاع الشبكات لانه واخد امتحان سيرفر وانفرا يعنى كده هو قدر انه يكسب كمان الراجل بتاع الشبكات ومش يكسبه وبس لا ده الراجل بتاع الشبكات بقى محتاجه جدا فى حاجات كتير زى الايزا والـ اس ام اس سيرفر والنظام الجديد كله من ميكو هيخلى الجهاز كله عبارة عن قاعدة بيانات والشبكة نفسها قاعدة بيانات وساعتها هننادى على مين...برافو...الراجل بتاع قواعد البيانات...شفتم بقى الراجل ده بقى متوغل ازاى فى حياتنا واصبح لا غنى عنه...عشان كده لو حد سألنى تراهن على مين...اقوله بمنتهى الثقة...على الراجل بتاع قواعد البيانات...وده مش بعيد ده قريب وقريب جدا يعنى فى اقل من 5 سنين الراجل ده هيأخد حقه تالت ومتلت وابقوا قولوا أحمد قال
اتمنى انى ما أكونش ظلمتهم أو اديتهم اكبر من حقهم

الطيب والشرس والقبيح

السلام عليكم
اظن أنكم مستغربين من عنوان الموضوع بس ده انسب عنوان جه على بال دماغى الذرية اللى انتم عارفينها طبعا...المهم اسمحولى اقولكم اية قصدى بيها
طبعا انتم عارفين ان فيه 3 تخصصات اساسية فى الكمبيوتر وهما الشبكات والبرمجة وقواعد البيانات...طبعا فيه تخصصات تانية بس مش بنفس قوة التخصصات ديه زى مثلا الجرافيك والهاردوير وغيرها
وطبعا كل تخصص من التخصصات الاساسية سواء شبكات او برمجة او قواعد بيانات بتتفرع يعنى مثلا فى الشبكات فيه شبكات ميكو وشبكات سيسكو ونظم تشغيل وغيرها وبرده فى البرمجة عندنا فيجوال وسى وغيرها وقواعد البيانات عندنا اس كيو ال بتاع ميكو وماى اس كيو ال وغيرها...بس ياترى اية علاقة ده بالموضوع؟!!!...اصبر ماتستعجلش
ياترى حد خمن لو هو كان شغال فى اى تخصص من التلاتة هو انهى واحد فى دول ...ها عرفت؟
الطيب هو الراجل المبرمج اللى بيتعب عشان يعملنا البرامج اللى بنشتغل بيها سواء كان بيبرمج على الويندوز او على الويب اة فى اى حتة...وطبعا الراجل ده لام يكون عنده فكرة عن كل حاجة يعنى لازم يكون عنده فكرة عن الشبكات وفكرة عن قواعد البيانات والا كل برنامج هيعمله هيشتغل على الجهاز بتاعه هو بس وهيبقى زى اللى قاعد على جزيرة لوحده
الشرس وده طبعا اكيد انتم قدرتم تخمنوا يبقى مين....برافو هو الراجل بتاع الشبكات لان الراجل ده يا جماعة لو فاهم قعلا فهو عبارة عن مصيبة تسير على قدمين...يعنى مثلا خد عندك السيناريو ده تخيل مثلا انك زعلت الراجل بتاع الشبكات عندك فى الشركة...لو هو راجل غبى عيرد عليك ويتخانق معاك وانتم الاتنين غالبا هتترفدوا لكن لو كنت بتتعامل مع راجل شبكات بمعنى الكلمة فهو هيسيبك تقول اللى انت عايزه لكن توقع الاتى...طبعا الحركات بتاعت انه يهنج الجهاز بتاعك او يخليه يعمل ريستارت او يفصله من النت طبعا مش هيعملها معاك لانك اكيد هتناديه عشان يصلح المشكلة ديه...عشان كده هيعملك حاجة الذ من كده بكتير يعنى مثلا اية رايك لو تلاقى ميل يوصل لكل الموظفات الجميلات عندك فى الشركة منك ويحتوى على اللى بالك فيه بقى ياريس وانت ياغلبان معندكش فكرة عن الموضوع...أو مثلا يعنى اثناء التفتيش المفاجىء على الاجهزة نلاقى عندك بيانات المفروض ماتكونش عندك او برده نلاقى حاجات من اللى بتعاقب عليها مباحث الاداب او مقالات من اللى بتشمشم عليها مباحث أمن الدولة...ياحلاوتك ...كده رحت بلاش ياريس...وغيرها وغيرها من الحاجات اللذيذة اللى ممكن تحصلك لو بس الراجل بتاع الشبكات حلم انك زعلته فما بالك لو زعلته فعلا
القبيح وده طبعا الراجل بتاع قواعد البيانات وده انا مش هاتكلم عليه كتير المرة ديه لان ده بقى قصة لوحده...انا بس عايز اقولكم فين جانب القبح الموجود فيه...اقولك ياسيدى...الجانب الوحش ده جاى من ان الراجل ده دارس قواعد بيانات اللى هى تخصصه طبعا ودارس شبكات على الاقل جزء مهم من الشبكات وبحكم انه بيكتب كوماند فى الـ اس كيو ال فهو متعود بشكل او باخر على البرمجة او على الاقل فاهم المبادىء بتاعتها ده من غير ذكر طبعا معرفته بالسكربتات وديه لوحدها مشكلة تانية خالص
ها ياترى كنت ظالم ولا مبالغ ولا باتفرج على افلام كتير...هأنتظر اعرف رايكم واشوفكم فى موضوع تانى إن شاء الله

د/محمود عبد البديع

السلام عليكم
عارفين يا جماعة اية اللى بيغيظنى فى البلد ديه..إنك تلاقى الناس اللى بتفهم مش شغالة او بالكتير اوى شغالة فى أماكن غير متناسبة بالمرة مع علمها او إمكانياتها..زى محمد حسام أو طارق إبراهيم أو يونس وغيرهم كتير وتلاقى ناس تانية معلوماتها مقارنة بالناس ديه مفيش داعى لذكرها..اه صحيح محدش يقدر من الناس اللى شغالين بالكوسة أو بالواسطة انهم يستمروا فى مناقشة مع الناس ديه أو حتى انهم يحطوا عينهم فى عينيهم...لكن فى النهاية السؤال هو انت شغال فين؟!!! دلوقتى ممكن واحد يسألنى طيب وازاى الشركات الكبيرة تسمح لحد مش محترف أو واحد علمه على قده انه يشتغل عندها...وعشان تعرفوا ازاى اسمحولى انى احكيلكم على حكاية
المكان: البحرية المصرية
الزمان:- كل يوم
الحدث:- بصوا يا جماعة فى البحرية فيه شوية اماكن عشان تدخلها لازم تكون جايب واسطة وواسطة جامدة كمان يعنى من عميد وطالع ده لو انت عايز تعدى جيشك وانت مرتاح زى مثلا القيادة أو الشعبة...لكن اللى بيحصل أن مش كل اللى فى القيادة أو الشعبة عساكر جايين بالواسطة...طيب ليه؟!!!حد قدر يستنتج قبل ما يكمل قراية؟
اقولك ياسيدى...الاماكن ديه لو كلها بقت عساكر جاية بالواسطة يعنى كلها عساكر بنت ناس تقدر تقوللى مين اللى المفروض ينضف ولا الااماكن ديه بتتنظف لوحدها؟!!ومين اللى هيقف خدمة بالسلاح عليها؟!!!ولا الاعداء مثلا مش هيعدوا من هناك عشان العساكر ولاد الناس اللى هناك؟!!!...يبقى إذن لازم يكون فيه حد يشيل الليلة يا جدعان ولا اية؟ عشان كده بيبقى 80% وسايط والباقى عساكر صعايدة أو فلاحين وهما دول اللى بيشتغلوا فعلا...ياترى شفت العلاقة ولا لسه؟
إذن الشركات ديه بتشغل الناس اللى بتفهم والوسايط زى ما بيحصل مع الصعايدة وولاد الناس
طيب والحل؟
والله مش عايز اقول مفيش حل...بس اللى اقدر اقوله ان اللى ممكن انت كراجل فاهم انك لو مش شغال أو شغال فى مكان مش مناسب امكانياتك هو انك تطبق نظرية د/محمود عبد البديع واللى انا شخصيا باطبقها والنظرية ديه بتقول
أنا بأشتغل انهاردة بأسلوب أنهاردة...لكن معايا شهادتى اللى تنفعنى بكرة
يبقى أحنا يا جماعة لازم نطور من إمكانياتنا ومش نيأس أبدا مهما حصل لأن أكيد اليوم ده جاى و إن شاء الله هيجى وساعة ما ييجى...وياخوفى من اليوم ده...ساعتها فى إعتقادى إن الناس اللى بتقهم أول ما هتأخد فرصتها هتبقى حاجة من اتنين يا أما هتريح وتبطل تتقدم لحد ما تبقى زى الناس اللى كانت بتتغاظ منها يا أما هتفضل تذاكر وتتعب وتابع الجديد كل يوم لحد ما تبقى اسطورة فى مجالها عملا بالحكمة اللى بتقول:
صاحب الفكرة الواحدة اما أن يصبح مجنونا أو يصبح عبقريا
بس يا جماعة أنا وصلت للاخر ويارب أكون قدرت أقول حاجة
شكرا

طيب وبعدين

يا جماعة انا عايز رايكم اية الحل فى الشركة اللى اسمها مايكروسوفت ديه
كل ما الواحد يقول عايز يذاكر حاجة تلاقى الشركة راحت منزلاله حاجة جديدة سواء فى الحاجة اللى بيذاكرها او منتج جديد يكتشف انه لازم يدرسه...والموضوع ده ظاهر بالذات مع الناس بتاعت الشبكات لان الشركة بتلعب معاهم لعبة الزمن..تلاقيها بتنزل منتجاتها على فترات معينة بحيث ما تلاقيش وقت حتى تعرف الشراكات التانية بتعمل اية وطبعا يبان لك انك المستفيد عشان انت بتدرس اكتر لكن الواقع انك ممكن تكون بتتعلم حاجة جديدة لكن مازلت بتدور فى نفس الدايرة بتاعت مايكروسوفت..وديه انا باشبهها بالميكانيكى اللى طول عمره شغال فى العربيات الفيات...اه بقى خبير فيها لكن فى النهاية هو مش بيفهم الا فيها...متهيألى كده الموضوع وضح شوية
على العموم انا شايف ان احسن حاجة الواحد يعملها انه يكمل طريقه ويركز على كام منتج بس من منتجات الشركة ويشوف بقى بقية الحاجات التانية يعنى مثلا لوكان غاوى نظم تشغيل ممكن يشوف اللينكس او السولاريز...ولو كان غاوى شبكات زيى كده يعنى ممكن يشوف بقى سيسكو مثلا وبكده يبقى كسب الاتنين اولا بقى خبير فى احد منتجات الشركة زى الاكسينج مثلا او الايزا وفى نفس الوقت بقى خبير فى تخصصه سواء شبكات او نظم تشغيل لانه شاف شركات تانية
متهيألى ده انسب حل...بس ياريت لو حد فيكم يا جماعة عنده البديل ياريت يقولى لان اخوكم جاب جاز وزيت وبنزين كمان