حضرتك محترف ولا خبير

السلام عليكم
لحد انهاردة الصبح مكنتش عارف هاتكلم فى اية...عارفين لما المواضيع تبقى كتير وفى نفس الوقت الواحد دماغه تبقى فاضية!!! متهيألى ده كان احساسى انهاردة لحد ما قررت انى اصارح نفسى واصارحكم بمشكلة كنت اخدت فيها رأى ويبدو انه طلع رأى خاطىء شوية...مش عارف انا هأقولكم وانتم تحكموا بنفسكم.
انا من زمان وانا مقتنع اننا فى عصر التخصص ومش كده وبس لا ده انا زودت ان لازم يبقى فيه تخصص جوه التخصص وبكده نخلق جيل من الخبراء عندنا اللى بجد مصر محتاجهم دلوقتى...
وطبعا لو حبينا نعرف يعنى اية خبير هنلاقى تعاريف كتير زى مثلا انه الراجل الذى يعرف الكثير جدا عن القليل جدا او زى ما بيقول صديقى عمر المعتز اعرف كل حاجة عن حاجة واعرف حاجة عن كل حاجة...ده غير بقى تعاريف كتير اكيد تكونوا انتم قريتوها...
طبعا معنى كده ان الواحد يبقى خبير ده شىء كويس نظرا لان معناه ان الراجل ده مؤمن بالتخصص وفاهم كويس جدا فى الحاجة اللى هو متخصص فيها...لكن
معنى ده برده ان الراجل ده مايعرفش حاجة خارج مجال تخصصه او بالكتير اوى يعرف حاجات قليلة جدا خارج مجال تخصصه...فمعنى كده انى عشان اقوم مثلا بعملية انتحارية فانا محتاج واحد خبير فى الأسلحة البيضاء وخبير فى الأسلحة الخفيفة ( مسدسات وبنادق ) وخبير فى الالتحام وخبير فى المفرقعات وغيره وغيره يعنى بنتكلم فى حسبة من 10 – 12 راجل...مشكلة طبعا
تعالوا بقى نشوف الراجل المحترف...الراجل المحترف ده راجل بيعرف يعمل كذا حاجة...واقرب مثال لينا فى الحياة هو الصديق كيفن متنك...ده فى رأيى راجل محترف مش خبير لان الراجل ده بجانب عبقريته فى الشبكات فهو بيعرف برده فى الاتصالات وطبعا ما ننساش ان اول عملية هاك قام بيها كانت على شركة بل للاتصالات ده غير انه فاهم برمجة كويس ونظم تشغيل وبرده قواعد بيانات...وهو ده المقصود بكلمة محترف انه بيكون بيعرف كذا حاجة...صحيح مش بيعمل كل حاجة بنفس الدرجة اللى بيعملها الخبير لكن على الاقل تكون واثق انك تحطه فى أى مكان وانت عارف انه هيعرف يتعامل مع المشكلة كويس جدا او على الأقل هيقولك سبب المشكلة ويقولك حلها اية نظريا على الأقل...
يعنى لو كانت عملية انتحارية برده فأنا ممكن ادمج الراجل بتاع الالتحام مع الراجل بتاع الاسلحة الخفيفة.
طبعا لو جينا طبقنا الكلام ده على مجال الـ IT فلو كنا بنتكلم غير قانونى وده طبعا مجالى المفضل فأعتقد اننا لو عايزين نعمل هاك او أقتحام لشبكة فعلى طريقة الخبراء فأنا بعدما أعرف الشبكة ديه شغالة بأية هاقدر اقول انا عايز واحد تخصص ويندوز وواحد سيسكو وواحد بيعرف سى وواحد بيفهم يعنى اية WEB وواحد اتصالات وواحد هارد وير وهكذا لحد ما تلاقى نفسك عملت TEAM فعلا لمجرد انك قررت تقتحم شبكة صغيرة...صحيح هتضمن كفاءة العملية لكن هتواجهك مشاكل من نوعية الخوف من تداخل الأختصاصات ده غير صعوبة السيطرة على كل العدد ده.
لكن لو قررت تشتغل بطريقة المحترفين فأنت تقدر تختصر العدد ده يعنى مثلا تكون محتاج واحد بس شبكات وواحد برمجة وواحد شغال على قاعدة بيانات مماثلة لقاعدة البيانات اللى ناوى تقتحمها..يمكن تواجهك صعوبات لكن على الأقل التنسيق هيبقى اكبر بكتير..
فيه حاجة صحيح انا لاحظتها ان معظم الـ Bad Guys كانوا محترفين زى كيفن ميتنك وايان مورفى وغيرهم فى حين ان الـ Good Guys زى توماس شيندر و بيل جيتس كانوا خبراء ...متهيألى ديه حاجة تستحق الدراسة.
فيه بقى مشكلة دلوقتى…على افتراض ان حضرتك مثلا شغال PHP وخبير فيها هل تقرر تبقى محترف وتتعلم حاجة تانية؟ وياترى الحاجة التانية ديه تكون برده فى مجال تخصصك يعنى مثلا تتعلم ASP ولا تتعلم حاجة تانية خالص زى مثلا الشبكات او الهاردوير؟!! مشكلة اكيد...وانا عجزت عن حلها فعلا...خايف اغير نظريتى اللى قعدت انادى بيها...التخصص جوه التخصص...ياترى الايام هتثبتلى ان النظريه ديه صح ولا هتثبتلى انها غلط؟

"بعد استبعاد المستحيل فإن الحقيقة سوف تتبقى مهما بدت غرابتها"..أجاثا كريستى

أخ غير شقيق

السلام عليكم
ازيكم يا جماعة اخباركم اية...الصراحة انا مابقتش اقدر اصبر على حكاية بلوج واحد بس كل اسبوع...لانى بيبقى نفسى احيانا كتير انى اكتب اكتر من مرة فى الأسبوع بس بأقول ان مرة واحدة فى الاسبوع كفاية عشان يبقى فيه نظام وفى نفس الوقت الناس ما تزهقش.
انهاردة الموضوع ممكن يبسط ناس ويزعل ناس تانية لانى بأتكلم عن حاجة انا نفسى بأعانى منها كتير وكل الناس اللى فاهمة IT فعلا اكيد بتعانى منها...الا وهى حكاية الأخ الغير شقيق
طبعا انا مش بأتكلم عن الأخ الغير شقيق اللى ممكن يجى فى بالكم...مممم...انا باتكلم عن الاخ الغير شقيق فعلا لكل واحد فاهم فى الـ IT فعلا...الا وهو الأخ خريج المنح الحكومية أو الخاصة اللى بقت منتشرة بطريقة رهيبة فى الفترة اللى فاتت...طبعا انا عارف ان واحد هيجى يقولى مش كويس ان الحكومة بتعلمكم ببلاش...والحقيقة ان الكلام ده بيضحكنى فعلا..لأن غرض الحكومة مش ان حضرتك تتعلم...لا...الموضوع بالنسبة لها مش أكتر من غسيل أموال...أو مراضاة لشخص ما...بصوا الموضوع كبير ومش عايز ادخل فى تفاصيله عشان هى معقدة شوية...لكن اللى يهمنى فى الموضوع ده هو الأخ الغير شقيق لكل واحد فينا
لسه من كام يوم كنت بأكلم واحد بيقوللى انه دخل منحة تبع وزارة الاتصالات ومطلوب منه انه يعدى الـ MCSE كلها فى حوالى 3 أشهر؟!!!
والغريبة انه كان فرحان انه بيذاكر التيست كنج فى يومين بس..على فكرة انا خدت الـ MCSE فى سنتين وكان كل تيست كنج بأقعد فيه مش اقل من شهر أو شهر ونص..الظاهر ان الناس ديه يا اما عباقرة يا اما انا اللى ذكى حبتين!!!
دلوقتى بقى تعالوا نشوف اية العيوب فى الاخ ده
1- بيطلع زى ما دخل معندوش فكرة عن اى حاجة خالص...كل اللى بس زاد عليه هو الشهادة اللى علقها فى الصالون مش اكتر...لكن تسأله بتاعت اية ديه..ولا انت فهمت اية...يقولك انا راجل Certified ومحدش يكلمنى كده!!!
2- الزحمة اللى بيعملها فى سوق العمل على الفاضى...اية الفايدة لما يكون عندى فى مصر 10000 مهندس شبكات مش بيفهم فيهم غير 500 والباقى ياريتهم خدوا الشهادة واشتغلوا اى حاجة تانية...لا...دول للأسف خدوا الشهادة وقرروا ونزلوا فعلا سوق العمل وللاسف اشتغلوا..برغم ان الشركات عارفة ان الناس ديه مش فاهمة لكن شغلتهم طبعا لنظرية الـ 80 و الـ 20% اللى اتكلمت عنا قبل كده بالإضافة إلى ان المستخدم هنا مش فاهم فأى حاجة هتتعلمه هيوافق عليها فورا وهو معتقد انه أخد افضل جزء من الصفقة وطبعا الناس اللى مش فاهمة هتطبق المثل اللى بيقول ليس فى الأمكان أبدع مما كان!!!
والنتيجة هى الحال اللى البلد وصلتله...ناس فاهمة مش لاقية شغل وناس مش فاهمة وشغالة...وكله ماشى...مش المهم بنيجى اخر الشهر بنقبض مرتب وخلاص و الزبون ما بيشتكيش!!!
3- قتل الأبداع مش فىالناس اللى بتفهم لان دول صعب جدا تقتل الابداع فيهم..لكن انا باتكلم عن قتل الأبداع فى المجال نفسه..لان الكريمة اللى على الوش اللى باينة هى الناس دول اللى مش فاهمين وهما اللى بيلاقوا نفسهم فى موضع اتخاذ قرار فطبعا هيتصرفوا بنفس التقليدية ويأخدوا القرارات اللى هما هيشوفوا انها هتأمنهم بغض النظر عن العائد اللى ممكن يتحقق لو قرر انه يخاطر مخاطرة محسوبة!!!
طبعا الكلام ده ينطبق اكتر على الناس الحكوميين اللى خدوا المنح الحكومية اكتر..لكن بالنسبة للناس اللى بس قدموا فى المنحة وخلصوها بنفس الطريقة الكوميدية ديه وبرده نزلوا سوق العمل...ومعظمهم اشتغل فى القطاع الخاص فدول بقى منهم لله بجد...كمية لامبالاة وسلبية فى التعامل مع التكنولوجى الجديدة لان هما بطبيعتهم اتعودوا على الحفظ بس فطبعا المصطلحات اللى زى الأبداع او التجديد مش موجود فى القاموس بتاعهم...ده غير طبعا الطريقة اللى بيعاملوا بيها الناس اللى بتفهم ولو انى عارف انهم ما يقدروش يستغنوا عنهم...مممم....باختصار اقدر اقول العلاقة مابينهم ومابين الناس اللى بتفهم هى العلاقة ما بين البهظ بيه وأبو صلاح؟!!! مع الاعتذار طبعا لمحمود ابو زيد مؤلف الفيلم الشهير
وطبعا السؤال اللى بيطرح نفسه دلوقتى هو اية الحل؟
الحل للاسف فى ظل الفوضى الخلاقة اللى البلد بتمر بيها وطبعا مجتمع الـ IT كله بيمر بيه هو اننا ننتظر حدوث حركة او ثورة أو طفرة لتصحيح الاوضاع ديه...لأن المشكلة جاية من الحكومة لانها هى اللى بتقدم المنح ديه...لانى انا كمان ما اقدرش ألوم الشخص اللى راح وقدم فى المنحة وهو مايعرفش حاجة عن الكمبيوتر اصلا وبيبقى سعيد انه خلص الشهادة فى أقل وقت ممكن!!! هم يضحك وهم يبكى.
الخطوة التاينة لازم تيجى من جانب الشركات القطاع الخاص...انا عارف ان واحد هيقوللى انا باشوف المتطلبات بتاعت الوظايف الاقيهم طالبين 5 سنين خبرة وشهادات اية وبكالوريوس اية...يبقى اكيد هما عايزين واحد بيفهم...يسمحلى اقوله انه غلطان...لان ممكن واحد يكون معاه الحاجات ديه وبرده اخ غير شقيق..افتراضك فى الشخص ده انه بيفهم لمجرد انه معاه الشهادات ديه كلها او انه خريج الجامعة ديه..ده شبه كده واحد بيقول على كل دكتور جامعة انه مثقف!!!!
لأن الراجل ده هيجى ويشتغل ويعمل أحلى شغل لكن للاسف معندوش جديد أو ابداع يقدمه...مش عارف ليه دايما بسأل نفسى ياترى لو كيفن ميتنك قرر انه يشتغل فى شركة...ياترى كان هينجح؟...ياترى كانت شركته هتكون بنفس حجم شركة بيل جيتس؟ عايزين الصراحة ما اظنش..لانه هو مصمم عشان حاجة تانية...حاجة محتاجة ابداع من نوع تانى.
لو احنا استمرينا على الوضع ده يا جماعة...صدقونى هنبقى عاملين زى ما صديقى محمد صلاح بيقول " إن البلد ديه بتتقدم بضهرها"
مع كامل احترامى ليك يا محمد يا صلاح...لأول مرة يبقى نفسى انك تطلع غلطان!
" إن الذى يوقعنا فى أخطائنا ليس ما لا نعرفه...ولكن الذى نعرفه بصورة خاطئة " أرتمس وودز

ثقافة الهاكرز

السلام عليكم
ياترى حد سمع فيكم عن المصطلح ده قبل كده؟ اكيد طبعا فيه حد سمع واكيد برده ان فيه كتير ماسمعوش
لو كان افضل اختراع عمله الانسان هو الكهرباء فى القرن الـ 19 فأحسن حاجة عملها برده الانسان فى القرن العشرين هى ثورة المعلومات المتمثلة فى الانترنت
طبعا كلام بايخ وعلمى زيادة عن اللزوم...بس كان لازم اقوله عشان تعرفوا يعنى اية ثقافة الهاكرز...اولا مين هم الهاكرز دول...دول طبقا لقاموس وبستر والقواميس العالمية المحترمة هما الناس اللى بيفهموا كويس جدا فى الكمبيوتر لكن بين الناس اللى شغالة فى مجال الكمبيوتر فهم الناس الوحشين اللى فاهمين كمبيوتر لكن بيخربوا وطبعا محدش يقدر ينسى فيلم The Hackers أو فيلم The Net وغيره من الافلام اللى اتكلمت عن الاخوة دول.
باختصار ثقافة الهاكرز ديه بتقول ان مفيش حاجة اسمها قيد على معلومة...يعنى كله متاح لاى حد...يعنى لو بنتكلم عن الكمبيوتر فمفيش حاجة اسمها لازم يكون معايا فلوس عشان اشترى نسخة نورتون كاملة او يكون معايا Credit عشان اشترى الكتاب ده أو اتفرج على القناة ديه...خلاص انسى الكلام ده
لان ثقافة الهاكرز غيرت الكلام ده كله...ممكن اطلب من حضرتك تفتح قائمة البرامج اللى عندك وتقولى كام برنامج كامل عندك؟ كام لعبة عندك على الجهاز برغم ان انت مادفعتش تمنها وما اظنش انك تعرف تمنها حتى والا كان أغمى عليك...لو لقيت برنامج كامل او لعبة كاملة او كتاب المفروض انك ماتنزلوش اصلا وبرده بقدرة قادر لقيته عندك ده يبقى لان فيه واحد مؤمن بالثقافة ديه وقرر انه ينشرها
طيب الموضوع ده بيتم ازاى؟
باختصار انا واحد جبت برنامج نسخة اصلية فبدل ما احوط على شمعتى عشان تقيد اكتر لا ده انا هاقول للناس يا جماعة انا عندى البرنامج الفلانى اللى انا دفعت تمنه بفلوسى خدوا نسخة منه اهه ببلاش...واحد يقولى طيب وانت هتستفيد اية؟ اقولك ولا حاجة..لكن كفاية انى ساهمت فى نشر ثقافة الهاكرز...حرية المعلومات يا جماعة
وفيه بقى الناس الخبراء اللى معهاش فلوس تشترى البرامج الكاملة ديه فبتعمل اية؟ بتنزل النسخ العادية وبعد كده بتعملها كراك وتنشر الكراك مجانا على النت...وقيس على كده بقى الاغانى والافلام الـ DVD الرهيبة والالعاب وغيرها كتير...طيب الكلام ده بينتشر ازاى؟
فى الاول خالص طلع شاب لذيذ كده وعمل حاجة اسمها نابستر وكان هدف موقع نابستر انه ينشر الاغانى مجانا يعنى حضرتك تقدر تنزلها على جهازك وتسمع مثلا اغنية singing in the rain والدنيا بتشتى بره ببلاش
لحد ما اخونا ده اتقبض عليه لكن كان الوقت فات...لان الفكرة انتشرت خلاص او زى ما بيقول مخرجنا جو أن الافكار محدش يقدر يمنعها لان لها اجنحة!!!
وظهر بعد نابستر مايسمى ببرامج الـ ShareWare زى الكازا والأى ميش والحمار الالكترونى!! أيوة هو اسمه كده هنعمله اية يعنى؟ وكل الناس بدأت تتبادل كل اللى عندها ببلاش وطبعا ده ادى لخسارة الشركات الكبيرة زى سونى وميكو وغيرهم كتير ولو ان خسارتهم كانت شبه الوجع اللى بيحس به الفيل لما يهجم عليه جيش من النمل مش اكتر
وبعدين الامر تطور جدا وبقى احلى واحلى لان ظهر عندنا ما يسمى بالرابيد شير والميجا ابلود والحوار اللذيذ ده...وده فكرته باختصار ان حضرتك عندك ملف بتحمله على اى موقع من المواقع ديه وطول ما فيه ناس بتحمل الملف ده هيفضل موجود واول ما يمر فترة معينة زى 30 يوم مثلا محدش حمل فيه ملف حضرتك يبقى باى باى ياريس هيتشال...فكرة جميلة جدا والناس اللى اتعاملت بالرابيد شير هتفهمنى كويس
طيب واحد يقولى انا اول مرة اسمع عن الموضوع ده...يبقى يسمحلى اقوله صحى النوم يا عم الكتكوت...بقى حضرتك عمال تعانى من البرنامج ابو 14 يوم ومكلم هريدى بن خالتك عشان يدورلك على شريط ريكى مارتن فى السوق عشان تنسخ الاغنية بتاعته على الكمبيوتر بعد كده...كل ده وفيه حاجة اسمها ثقافة الهاكرز؟!!! يا حلاوتك
انا هنا مش هاتكلم عن حرام او حلال لكن اللى عايز اقوله انه لو حرام علينا نعمل كده فهو حرام على الشركات تبيع برامجها بالاسعار ديه...تعرف حضرتك ان نسخة الويندوز سيرفر بـ 1000 دولار وان نسخة الفيفا 2006 سعرها حوالى 1000 جنيه مصرى...واوعى حد يقولى احنا فى سوق عرض وطلب...لانى من الاخر اشتراكى...ويحضرنى هنا قول صديقى الرفيق جورباتشوف لما وقف يخطب فى المجتمع الغربى وفى عز حماسه راح قلع الـ shoes بتاعه وقعد يضرب به على الستاند وهو بيقول سندفنكم ايها الرأسماليون أحياء!!!
ثقافة الهاكرز سوف تسود وهتعم العالم كله ومحدش هيقدر يوقفها...ياترى هتوافق تشارك فيها وليها ولا هتكتفى بمشاهدة المباراة من المدرجات؟

أحنا عايزينك معانا

السلام عليكم
أطول اسبوع فى حياتى كان الاسبوع اللى فات...كنت منتظر انى اقرأ تعليق منها تقولى فيها اد اية كنت انانى او انها سامحتنى أو انها بتكرهنى لكن للاسف مالقتش اى تعليق منها ياترى هى قريت اللى كتبته ولا قررت تبعد...عمرى ما اتمنيت لانسانة خير قد ما اتمنتلها هى...يارب فعلا تكون بخير وسعادة
اسف على المقدمة ديه لكن كنت محتاج اقولها فعلا
دلوقتى بقى ندخل فى الموضوع اللى كنت عايز اتكلم فيه...أظن حلم حياة أى واحد فينا انه يكون مروح بالليل وهو تعبان وبيلعن المكان اللى شغال فيه والناس اللى مش حاسين بقيمته وفجاة يلاقى قدامه عربية سودا رقمها 1347 ملاكى القاهرة ينزل منها واحد لابس اسود وتلاقيه منتظر انك تعدى من قدامه عشان تدخل باب العمارة بتاعتك وفجاة تلاقيه بيقولك ممكن تولعلى يا أحمد؟!!!!!!!!!!!
ايوة ده ندهلك باسمك أنت!!!! ساعتها المفأجأة مش هتخليك ترد باه ممكن او لا لانك مش بتدخن...لان الغريب ده عرف اسمك من غير ما انت تعرفه...وطبعا لما تسأله يقولك أحنا عايزينك معانا؟!!!...أظن انت ممكن تستنتج الباقى لو شفت رأفت الهجان.
ليه لا؟ الموضوع سهل جدا يا جماعة...لو انت موهوب فى اى مجال صدقنى فيه ناس عينيها عليك...ناس بتيجى اخر كل شهر تقبض عشان وظيفتها انها تدور على واحد زيك...انا هنا طبعا هأتكلم عن الموهوبين فى مجال الكمبيوتر بصفة خاصة لكن برده هأتكلم عن الموهوبين بصفة عامة.
اتذكر انى مرة قريت إن اول ناس بدأت تطبق السياسة ديه هى أمريكا خصوصا بعد ما الامريكان صحوا فجأة ولقوا واحد بيعملهم باى باى من جنب القمر ولما نادوا عليه وقالوله انت مين قالهم انا يورى جاجارين من روسيا!!!!
فى الوقت ده كانت سياسة الدنيا كلها انها بتنتظر الانسان العبقرى اللى بيخترع حاجة وبعد كده بيموت...فورد اخترع العربية..الاخوان رايت عملوا الطيارة..لكن امريكا قررت انها مش هتستنى العبقرى ده..أحنا لازم نخلقه.
وهنا سألوا نفسهم هو يعنى اية عبقرى؟
فتحوا القواميس ودورا لقوا ان العبقرى ده راجل أذكى من اللى حواليه وان نسبة وجوده فى العالم مش كتير وده مش بيتولد كل يوم...طيب والحل...بس خلاص لقيناها...طالما مفيش سوبر مان يحمى الرئيس إذن احنا نجيب كذا واحد وندرب كل واحد فيهم على حاجة معينة وبكده لما نجمع مجموع المهارات اللى الناس ديه بتعرفها يبقى عندنا فى الاخر سوبر مان.
وهوده اللى قرر الامريكان انهم يعملوه...وبدأت رحلة البحث عن الموهوبين فى امريكا نفسها الاول...لكن مش اى موهوبين...فيه موهوب يقدر يخطب فى الناس والناس تسمعله ده كويس...لكن فيه موهوب عنده المقدرة يعمل ده من غير ما الناس تمل منه ابدا...ده بقى اللى احنا عايزينه
فيه موهوب بيعرف كونج فو وجودو وهو مكملش 14 سنة ده برده كويس...لكن فيه موهوب بيعرف يقتل وهو عنده 14 سنة...ده بقى اللى احنا عايزينه
انا مرة قريت ان الـ CIA عندها واحد موهبته انه يقدر يتكلم فى التليفون اطول فترة ممكنة فى التليفون من غير ما تحس بلحظة زهق معاه!!!!!!!!!! على فكرة ده بيأخد مرتب على كده!!!!
تخيل بقى لو حضرتك عند موهبة زى ديه...فى الشبكات فيه ناس معاها شهادات كتير وناس بتفهم فعلا لكن للاسف مش موهوبين...يعرف يلاقى حل لمشكلة...لكن مايعرفش يبتكر حل لمشكلة...واحد مبرمج يقدر يعمل برنامج CRM وده طبعا مبرمج لا غبار عليه...لكن ما يقدرش يعمل برنامج يكسر به قاعدة الحساب فى الويندوز!!!!!
لو دورت جواك اكيد هتلاقى موهبة...يمكن ما تكونش قوى اوى فيها لكن لو موجودة وانت اهتميت بيها صدقنى هتعمل حاجة...على الاقل الناس ديه هتبص عليك...هتسمع عنك...يمكن ماتطلبكش انهاردة او بكرة لكن هيجى اليوم اللى تطلبك فيه...
لكن انا لاحظت حاجة يا جماعة...انت ممكن تكون موهوب فى حاجة خير او حاجة مالهاش لازمة زى مثلا اخونا اللى بيتكلم فى التليفون...لكن ثق دايما انه بنسبة 99% الناس ديه هتستغل موهبتك ديه فىحاجة وحشة على الاقل من وجهة نظرك انت... ليه؟ لان الناس ديه غالبا ما بتكون من جهات امنية...مخابرات ممكن...أمن الدولة احتمال...أو حتى رياسة الجمهورية...فطبيعى هى لو كانت عايزة حاجة خير كانت هتعمل اعلان فى الجرنان وتخلص...لكن دايما بيتم البحث عن الناس ديه فى سرية تامة جدا وقبل ما يعلنوا ده صراحة ليك فغالبا ما بتكون اتعرضت لاختبار منهم...حاجة كده زى كشف الهيئة فى الكليات العسكرية...اخر اختبار..وبعدها يا اما اه يا اما لا...تكون أو لا تكون
ياترى هل عندك استعداد تسيب وظيفتك ايا كانت مرموقة او لا...مرتبها كويس او لا...مستقبلها كويس او لا...وتوافق انك تكون معاهم...هتعمل كل حاجة نفسك فيها لكن بطريقتهم هما...بدل ما بتكلم حبيبتك بالساعات فى التليفون لا احنا عايزينك تكلم الراجل ده...بدل ما تكتب فىالجرايد مقالة الناس بتستناها كل اسبوع لا احنا عايزينك تراسل البنت ديه فى الهند...
لو فعلا نفسك فى ده...لو فعلا عندك الاستعداد لده...يبقى انتظر فى يوم تكون مروح فيه وانت تعبان وبتلعن المكان اللى شغال فيه والناس اللى مش حاسين بقيمتك...وما تستغربش لو لقيت عربية رقمها 1347 ملاكى القاهرة

معجزة...أية...وحى

السلام عليكم
اسمحولى المرة ديه مش هاتكلم عن الكمبيوتر ومشاكله...مش هأتكلم عن الشبكات ومستقبلها...مش هأتكلم عن اصحاب القبعات السوداء او البيضاء..المرة ديه انا هأتكلم عن حاجة أهم بكتير
مين قال أن زمن المعجزات انتهى؟ مين قال ان الوحى خلاص خلص؟...اسمحولى اقولكم ان الكلام ده مش صحيح...عارفين ليه؟ لان ربنا بعتلى معجزة...اية...وحى...فى صورة انسانة بريئة جميلة زى الموج ببتحرك...زى ما بيقول تامر حسنى
وللاسف انا ضيعتها من ايدى...وعارفين ليه..بسبب جبنى...وخوفى...وقلقى...من الوحش اللى انا خلقته وقررت اسميه المسئولية...ايوة انا خفت من المسئولية...ازاى كنت ممكن ارتبط بانسانة وانا مش عارف اية اللى ممكن يحصل كمان ساعة او بكرة او كمان شهر...احتمالات كتير فكرت فيها...ممكن انا اموت...او انى فى لحظة عصبية صوتى يعلى على صوتها...انى اقرر اسافر فجأة...انى اسيب الشغل...طيب ساعتها هى هتعمل اية...انا يبقى اية فايدتى فى الحياة...ناس كتير بتتهمنى بالعلمانية او انى ليبرالى...وباحاول اعرف سبب كل حاجة وإن قاعدة لا اجتهاد مع النص انا ما اعرفهاش...يمكن يكون عندهم حق بس انا اسف انا اتعودت انى احسب كل حاجة قبل ما اعملها...هل ديه طبيعة فيا؟...ولا شغل الشبكات هو اللى علمنى ده..أو يمكن الجيش هو السبب....حقيقى مش عارف...بس كل اللى اعرفه انى انا اللى خلقت الوحش اللى جوايا...وسميته كذا اسم..مرة سميته المسئولية...ومرة سميته المستقبل...ومرة سميته الخوف من المجهول...كنت باحاول اختار له اسم شيك...يقنعنى ان اللى عملته وباعمله صح...انا ما اعرفش حجم سيرفرات البلوج بتاعت مايكروسوفت اد اية...لكن اللى اعرفه انهاايا كانت لا يمكن تقضى اللى عايز اقوله عنها...عن جمالها...رقتها...أدبها...أخلاقها...مهما قلت مش هيجى جنبها حاجة...كل اللى اقدر اقوله انها هدية ربنا بعتهالى...او رسول عشان يهدينى ويرشدنى للطريق الصح...كنت المفروض اشركها فى حياتى واعرفها بمشاكلى وهمومى وأحزانى لكن انا اخترت انها تبعد عن مشاكلى كلها...يمكن كان يكون خوف عليها...او خوف عليها منى...أو خوف من نفسى انا شخصيا...هى كانت عايزة تعرف لكن انا اللى رفضت...
مش عارف امتى قررت انى ابعد عن حياتها نهائيا بعد كل الاتهامات اللى سمعتها سواء من ناس تعرفنى وتعرف حكايتى معاها او ناس كنت باقولهم ان ديه حكاية واحد صاحبى...ناس من كل المستويات الاجتماعية...وكلهم قالوا كلمة واحدة
" الشخص ده انانى"
ليه اعلق قلبها بيا...ليه اشغل بالها بيا...ومفيش امل ان الموضوع يتم...كتير هى حاولت تعرف السبب...لكن انا مارضتش اتكلم او ألمح...واكتفيت انى اقولها انها مش المسئولية بس لان فيه سبب تانى لكن للاسف مش اقدر اقوله...ومش عارف هل هيجى اليوم اللى هأصارحها بيه بعد ما اكون اتغلبت عليه وده علمه عند ربنا
انا خسرت حاجات كتير فى حياتى القصيرة ديه...لكن عمرى ماخسرت ولا هأخسر زى الانسانة ديه...عزائى الوحيد انها على الاقل ملت قلبى الفاضى...واللى لا يمكن يبقى فاضى بعدها...مش مهم انى اموت دلوقتى او بكرة او كمان ساعة...المهم انى عرفت معنى انى اكون انسان على ايديها...عرفتنى معنى يعنى اية انسان...قالتلى ان مش كل حاجة علم وبس...فيه حاجة اسمها دين...ان كتب مايكروسوفت ماتغنيش عن قراية القرأن...علمتنى ازاى ابص للناس المروحة الساعة 8 بالليل واتأمل جمال المنظر الانسانى الجميل ده...علمتنى يعنى اية جمال...يعنى اية خير...هى أختى وحبيبتى وامى وصديقتى ومدرستى وملهمتى وضميرى الحى...هى اللى انا عايش عشانها...هى اللى بأتمنى رضاها...اللى بأفرح لما تقولى انها دعتلى ساعة الصلاة...انها بتتمنالى انى احقق كل اللى بأحلم بيه...كفاية بس انى اسمع صوتها عشان أحس اد اية هى بريئة...انى اشوفها عشان اعرف اد اية ربنا بيحب الجمال...انى اتحول لطفل صغير بين ايديها...قبل ما يشوفها يتأكد ان القميص بتاعه مكوى...ان البنطلون بتاعه مناسب...احساس مابعده احساس...انا قررت انى مش اكتبلها على الميل يمكن تنسانى...وده اللى انا باتمناه فعلا من كل قلبى
انا مرة سألت عامل البوفيه فى المكتب اللى انا شغال فيه وهو امسه ربيع...شاب زى كل الشباب المصريين المكافحين...أقصى اماله انه يرتبط بانسانة يحبها وتحبه...سألته وقلتله
هل ممكن ياربيع من كتر حبك فى واحدة انك مش ترتبط بيها مع العلم ان عندك الامكانيات للارتباط؟
لقيته بيقولى طيب ازاى وليه مش ارتبط بيها...الصراحة معرفتش ارد عليه
وسألت طارق بن خالتى نفس السؤال وقلتله انى كمان هاكون فرحان لما اعرف انها مخطوبة لواحد تانى...لقيته بيقولى ان ده جنون...وبرده معرفتش ارد عليه
مش عارف ليه الموقف اللى انا فيه فكرنى بالفيلم الكلاسيكى الجميل غزل البنات...لما استاذ حمام كان بيحب ليلى بنت الباشا وفى نفس الوقت هى كانت بتحب وحيد الطيار ولما راحوا ليوسف بك وهبى...وقاله انك المفروض تفرحلها لانها هتبقى سعيدة مع الانسان ده...وهو فى الاول زعل واتضايق وغضب..لكن لما راجع نفسه اكتشف ان كلام يوسف بك وهبى صح...حاسس انى باعيش نفس التراجيديا
ياترى هى هتقرأ الكلام ده؟...ياترى ردها هيكون اية...ياترى هتفكر فى اية...ياترى هى اخبارها اية...اسئلة كتير جوايا...عنها وبيها وليها...كل اللى يعنينى هى سعادتها وبس...ولو حد فيكم يعرفها ياريت يبلغها انها احيت انسان من تانى...انها اديت لانسان الامل فى بكرة...انى لا يمكن أحب حد غيرها...قولولها انى اسف عشان شغلت قلبها من غير أمل...اد اية كنت انانى...ياريت تسامحينى