شواذ و عاهرات

السلام عليكم
كارثة..والله العظيم كارثة..اية اللى بيحصل ده يا جدعان..قطار بحاله يدخل فى قطار تانى..والخبر يعدى كده عادى جدا وكأنه كان قطار بضايع مش قطار شايل كائنات تصنيفها البيولوجى انها بنى أدمين!!!
على رأى صديقى أحمد مدرس الانجليزى ده لما حد بيخبط فى حد بيقوله لا مؤاخذة فما بالك بقطار بحاله؟!!
وطبعا الموضوع هيعدى وبالكتير اوى زى ما عملوا فعلا لبسوها لمدير السكك الحديدية و النائب بتاعه والسواق بتاع قطار بنها او أسكندرية مش مهم..لكن المجرمين الحقيقين هيفلتوا ولازم يفلتوا..عارفين ليه عشان احنا بلد بقت الفهلوة هى البديل بتاع العلم و الكدب والنفاق بقى البديل الطبيعى للحق و الصراحة..
وزير النقل منصور زبالة طالع يقول انه هيعاقب المسئولين ايا كانوا وهو مش واخد باله انه اصلا متهم..مش عارف ليه افتكرت خطبة جمال عبد الناصر لما قال انه على استعداد لتحمل المسؤلية كاملة بعد نكسة 67 مع انه already متحملها مش هو رئيس الدولة ولا اية النظام يا جدعان؟
مقدرش اقول غير ان اللى بيحصل ده مش تصرفات مسؤلين المفترض انهم كبار او فاهمين..لا خالص ديه تصرفات عاهرات او شواذ..ناس بتتنصل من المسؤلية عادى جدا..وهيروح وزير النقل وهو راضى عن نفسه لانه رفد رئيس هسئة السكك الحديد هو و النائب بتاعه اللى برده ينطبق عليهم قاعدة الشذوذ..لكن القواد الاصلى لسه ما اتحاكمش ومش هيتحاكم..
وانا بقرا الجورنال لقيتهم كانوا مغطيين قصص الناس اللى عاشوا أو بالاصح نجوا من المذبحة ديه..قصص تشيب..قصص لو قرأها ستالين نفسه كنا لمحنا لمعة الدموع فى عينيه..لكن اللى عندنا خلاص من كتر معاشرتهم الجنسية للفساد والنوم فى أحضان الدولار فقدوا الاحساس..نسوا ربنا..فقدوا شرفهم.
دلوقتى بس صرفوا 8.5 مليار جنيه على تطوير السكك الحديد وطبعا هيتلهف منهم فى النصف مبلغ محترم سواء للشاذ ده او القواد ده أو الحرامى ده.
ارجو من كل مواطن بعد كام شهر من دلوقتى وبعد ما يخلص التجديد فى القطارات وانت راكب القطار سواء قطار ابو قير هنا فى إسكندرية أو أى قطار فى اى حتة فيكى يا مصر افتكر انك مش قاعد مستريح دلوقتى الا عشان اخوك و أخويا ابوك و ابويا أختى واختك ماتوا فى حادثة قطار قليوب والصعيد و كفر الدوار وغيرهم..المهم ماتنساش تقرأ الفاتحة عليهم وعلى مصر.

"العالم هو مكان خطير للعيش فيه..ليس بسبب الناس الاشرار فيه..لكن بسبب الناس الذين لا يفعلوا شىء لتغييره"..ألبرت أينشتين

سنة سودة يا جميل

السلام عليكم
حد يعرف إحنا سنة كام؟..أكيد كلكم عارفين..طيب حد يقدر يقولى السنة الجاية سنة كام؟..مممم...مش أظن ناس كتير تعرف..لأن السنة الجاية هى السنة السوداء...هاهاهاهاها..انا سامع حد فيكم بيقول ده اية التشاؤم ده يا اخى!!..أو يمكن حد بيقول إن شاء الله تبقى سودة عليك انت لوحدك يا أخى!!..مش مهم
انا بس عايز اقولكم ليه هى سنة سوداء على الاقل من وجهة نظرى انا؟...بصوا بقى يا جماعة..طبعا أكيد جزء منك قرأ الكلام اللىانا كنت كاتبه عن لعبة مايكروسوفت الزمنية الرهيبة عشان ماتقدرش تسيبهم أبدا...الخطة بسيطة جدا...دايما استحوز على انتباهم...دايما هيفضلوا معاك...ومايكروسوفت المرة ديه قررت انها تضرب الضربة القاضية فى عالم الشبكات...السنة الجاية الشركة هتنزل 5 منتجات جديدة..عارفين اية هما؟
1- Windows Vista
2- Exchange 2007 (E12)
3- SMS 2007
4- ISA 2006
5- وطبعا Windows LongHorn
انا سامع واحد دلوقتى من المتحمسين بيقول هيييييييييييه..الله...ده فيه حاجات جديدة نازلة..يعنى العيشة هتبقى أحلى..وكله هيبقى ألسطة..ساعتها بقى يسمحلى أقوله إنه متفائل جدا!!!
زمان كنت انا بأفرح لما الشركة بتنزل منتج جديد وانا لحد دلوقتى لسه فاكر المناقشات اللى كانت بينى وبين صديقى Comrade General طارق ساعة لما كنت باقوله إن الشركة هتنزل نظام تشغيل جديد او سيرفر جديد..ساعتها كان بيقولى إن ده عندهم كـ Software Enginnering غلط..فى حين أنى انا كنت باقوله أن طالما الشركة عندها جديد طيب ليه ماتقدموش؟!!طبعا طارق كان بيتكلم من وجهة نظر مبرمج..فى حين انا كنت باتكلم من وجهة نظر واحد بتاع شبكات وفى نفس الوقت أنا باتعامل مع المستخدم أكتر ويمكن أكون فاهم أكتر لأحتياجات المستخدم..بس تعالوا بقى نشوف اية اللى حصل؟
أولا الشركة بدأت تهدأ شوية من حيث موضوع السيرفرات يعنى كان الفرق ما بين 2000 و 2003 حوالى 3 سنين لكن الفرق ما بين 2003 و LongHorn أكتر من 4 سنين بشوية ونفس الكلام ينطبق على الاكسينج وبقية السيرفرات..يعنى من الاخر المعدل اللى الشركة بتنزل بيه السيرفرات ونظم التشغيل معدل ممتاز لكن فى حالة واحدة بس إن الراجل اللى هيشتغل على السيرفر ده مش هيشتغل على أى حاجة تانية غيره..بمعنى إن الراجل بتاع الأكسينج مش هيشتغل الا عليه هو بس..الويندوز يعنى ويندوز بس..وطبعا الكلام ده مش بيحصل..وممكن أى حد يفتح الجورنال عشان يتأكد..
إعلان وظيفة:
مطلوب مهندس شبكات يجيد العمل على WINDOWS 2000-2003 و Exchange 2003 و SMS و ISA 2004 و الـ SQL is a plus !!!
ناس دمها خفيف مش كده بس للاسف هو ده اللى حاصل...تقريبا هو الاعلان كله صح بس فيه غلطة واحدة وهى أنهم المفروض يشيلوا مهندس شبكات ويحطوا سوبر مان!!
ده طبعا غير بقى السيرفرات الصغيرة زى الـ WUS و الـ Sharepoint والـ LCSوغيرها من الحاجات اللى بتنزل وطبعا لازم الأدمن يكون عارفها عشان تسهل عليه شغله..كارثة طبعا
يمكن أهم حاجة هتنزل فى السيرفرات ديه كلها هى الـ LongHorn لان المرة ديه مش سيرفر عادى فيه قوة 2000 أو عبقرية الأداء فى 2003 لا المرة ديه هتحس كأنك قاعد على يونكس او لينكس..خمن ليه؟...برافو...عشان مفيش GUI..Surprise...مش كده..بس هى ديه الحقيقة..الواجهة بقت أختيار لو أنت عايز تنزله نزله ولو مش عايز بلاش..الظاهر إن حلم David Cutler هيتحقق قريب..لأن ده كان حلم الراجل من ساعة ما بيل جيتس قرر انه يدخل عالم الشبكات ونظم السيرفرات وسأل وقال مين أحسن واحد بيعمل نظم تشغيل سيرفرات؟..قالوله فيه واحد اسمه ديفيد كاتلر اللى عمل نظام الـ VMS الرهيب..قالهم بكرة الصبح يكون عندى..وفعلا جه الراجل وقاله خير ياعم بيل جيتس عايز اية؟!!..طبعا ساعتها واحد زى بيل جيتس بالنسبة لديفيد كاتلر هو طفل صغير لسه بيخطو أولى خطواته فى عالم الكمبيوتر..فبيل جيتس قاله انا عايز اعمل نظام تشغيل للشبكات..كاتلر قاله أنت تؤمر..لكن الراجل كان معتقد ان بيل عايز نظام زى اليونكس او الـ VMS لكن بيل قاله لا..أنا أهم حاجة عندى راحة زباينى عشان كده عايز فيه ألوان وحركات وحاجات بتطير..كاتلر قاله بلاش أحسن..لأن كده النظام مش هيبقى Stable..بيل قاله ماليش دعوة..وقد كان وبدأ الراجل يشتغل مع الفريق بتاعه وممكن تدخلوا على موقع WIKIBEDIA عشان تسمعوا كاتلر كان بيكلم الناس اللى كانوا شغالين معاه ازاى..لأن سمعة الراجل عنده اهم من بيل جيتس او مايكروسوفت نفسها..لحد ما طلع النظام الخربان اللى اسمه Windows NT واللى قعد يتطور لحد ما وصل لـ 2003 بس الظاهر إن حلم كاتلر هيتحقق والظاهر كمان إن كلام بيل جيتس طلع غلط لأن كان المفروض النظام السيرفر يبقى من غير GUI عشان يقلل عدد الثغرات فيه..لأن اللى هيشتغل عليه مش حمادة وتوتو ورشا وعادل..لا ده اللى هيشتغل عليه مهندس أدهم او مهندس أحمد أو مهندسة لمياء..يعنى ناس ما يهمهاش أن يبقى فيه صور او حاجات بتطير..ده مش أكس بى يا بيل جيتس يا غبى..أخيرا فهمتها ولو أنها جت متأخرة بس معلهش حتى عشان مجتمع الـ IT يخف منه مدعى المعرفة أو الـ Wizards' guys
طبعا المنتظر بقى من جميع سكان العالم هو الفيستا وطبعا انا مش عايز اكون متشاؤم برده بس النظام معقد جدا يا جماعة...معقد لأقصى درجة..الا بقى لو انت هتفضل تستخدم الفيستا زى ما كنت بتستخدم الـ 98 أو الملينيوم يادوب كوبى وباست وتكلم صحابك على النت..ساعتها يبقى زى ما أنت ياريس وفكك بقى من الكلام الكبير ده..فيستا مين والناس نايمين
انا حاسس ان السنة الجاية هتبقى سنة الحسم لمهندسى الشبكات..ناس كتير هتسيب الشبكات..وناس كتير هتبقى حاجة فعلا فى الشبكات..للأسف معنديش نصيحة او حل لموضوع الانظمة والسيرفرات الكتيرة اللى الشركة بتنزلها..لكن انا عن نفسى قررت أنى مش هأكمل الا فى الويندوز وأخد سيرفر او 2 بالكتير أوى وبعد كده Welcome Cisco
ديه ناس محترمة..مفيش حاجة اسمها كل يوم روتر أو كل يوم بروتوكول..انسى..فيه تركيز واتزان فى عملية التطوير..الموضوع مش شوليطى موليطى..أخر حاجة أحب أقولها هى إن ربنا يستر فعلا السنة الجاية..ربنا يستر..
ياريت فعلا الناس المهتمين بحاجة اسمها IT و الناس اللى فعلا فاهمة يعنى اية شبكات وفى نفس الوقت بيرحبوا ويستوعبوا كل فكر جديد مهما كان..أنهم يقروأ الموضوع الجاى إن شاء الله.
"انا قريت كتب لو فردتها تطلعنى القمر وتنزلنى من طريق تانى خالص"...أنا