السلام عليكم
انهاردة يا أصدقائى يا مجانين الأنترنت..يا اللى بتفهمونى ويا اللى مش بتفهمونى...عايز أكلمكم عن ناس غريبة...ناس جاية قريب...يمكن تكون شفت واحد او اتنين منهم...يمكن قلت على حد فيهم مجنون أو عبيط او حتى بيتأمرك نسبة إلى امريكا يعنى..بس تعالوا نحلل ونلقى نظرة عن قرب على الناس ديه
ممكن حضرتك ترجع بذاكرتك لوراء كده حبة وتفتكر لما كنت بتنزل الشارع لأنى عارف ان أغلبكم مش بينزل الشارع الا للشديد الأوى زيى يعنى...فاكر الناس شكلها عامل ازاى...بص كده...لا سيبك من الناس الدقنوش والبنات اللى لابسين من غير هدوم...والشباب الفنكى...دول قصة تانية...لا بص كده على الشاب اللى شكله محترم ده لكن لابس لبس غريب شوية ولو سألت عليه جارك محمد هيقولك ده الباشمهندس أحمد...باشمهندس؟!!...باشمهندس مين يا جدعان..ده معفن...بصوا لبسه شكله عامل ازاى!!...وتسريحة شعره اللى هى من غير تسريحة وأخر مشط اضرب فى شعره كان من اسبوع...
انا نفسى أفتكر انى شفت الحاج أشرف رشاد ابن الحاج رشاد عثمان شخصيا ماشى فى الشارع على رجليه من غير ما يكون حالق دقنه ولابس بنطلون جينز جربان...بتقولوا مين يا ولاد؟...الحاج أشرف...بتقولوا مين؟...الحاج أشرف...مين؟...الحاج أشرف...بس طبعا الراجل ده من حقه يمشى زى ما هو عايز لانه مليونير...
حتى لما كنت بأحضر مؤتمرات لميكروسوفت اللعينة كنت بالاقى الشباب بما فيهم كريم رمضان ماشى وهو لابس بنطلون جينز...لا بدلة ولا غيره
احنا الأيام ديه فى مصر مش بنعرف الراجل ده لو كان محترم الا لو كان لابس بدلة..غير كده يبقى راجل عادى...ماشى اوك..اوك...انا شفت ناس لبسها أقل من عادى ومع ذلك اصحاب البدل بيحضروا بدلهم من قبلها بأسبوع لما يعرفوا انهم هيقابلوا واحد من الناس ديه...
لحد دلوقتى لسه فاكر الكلام اللى قاله الدكتور أحمد زويل عن اللى شافه لما راح امريكا...بيقول وانا هنا فى مصر كان عندى الخياط بتاعى وكنت بافصل بنطلونات وغيره...مثال للطالب الفلاح اللى كان بيطلع فى أفلام الثلاثينات...بيقولك لما رحت امريكا لقيت طلبة لابسين بنطلونات جينز مقطعة وواقفين بيناقشوا الدكتور...مين دول ياعم؟...لا ابدا...دول طلبة معاهم دكتوراة وبيسألوا استاذهم!!!
عارفين ليه الكلام ده موجود بره ومش موجود هنا..لسبب بسيط جدا...عشان الناس بره بتفهم لكن احنا هنا لا...طبعا مش هاقول نعمل زى المهزىء عصام كاريكا لما راح قابل سيدة الشاشة العربية وهو لابس شورت...معلهش يا جماعة ليس على الحمار حرج...اية ده يا أحمد انت هتدوخنا معاك ليه؟
لا دوخة ولا حاجة يا جماعة...انا بس باقول انك لو عايز تلبس اللى على مزاجك ألبس لكن بشرط تكون مميز...لكن لو حضرتك مش مميز فهتضطر اسفا تلتزم بقواعد العمل...طيب اكون مميز أزاى؟...بسيطة جدا...المميز ده بيكون مميز فى حاجة معينة...زى اية مثلا؟...ممكن يكون مميز بفلوسه فساعتها ممكن يروح كارفور او يطلع الهيلتون يطلب غداء وهو لابس تى شيرت وشورت...بس طبعا لا يمكن تلاقيه رايح الأوبرا مثلا وهو لابس بنطلون جينز لأن من شروط أنك تكون مميز هو انك تكون بتفهم برده...أو ممكن تكون مميز بعلمك فساعتها ممكن تروح مقابلة شغل وانت لابس قميص وبنطلون عاديين جدا...هل ممكن حد فيكم يتخيل واحد معاه CCIE رايح لشركة فودافون فى مقابلة شغل وهو لابس بنطلون كحلى على قميص أخضر ويترفض؟..متهيألى صعبة شوية...وممكن تكون مميز بموهبة عندك...وأشهر مثال على ده هو المطريبن اللى لو جم حتى بالأندروير هتلاقى مجموعة من البنات الحمقاوات الهيستريات بيشيدوا بشياكته...يعنى من الاخر حضرتك عايز تلبس اللى على مزاجك يبقى حضرتك لازم تكون مميز...بس خلاص
"الطلبة بره بتفكر...الطلبة هنا بتفتكر"...د/ أحمد زويل
